Эмил Токтошев, ЖК депутаты: “Мамлекет тарабынан бөлүнгөн акча дыйкандарга жетпей жатат”
-- Эмил Токтакунович, жакында эле округга барып келбедиңиздерби. Шайлоочулар кандай көйгөйлөрүн айтышты?
-- Эң негизги көйгөй – “мамлекет бөлгөн акчаларды, жеңилдетилген кредиттик каражаттарды алалбай жатабыз, банкка барсаң орой мамиле жасашат, “эртең, бүрсүгүнү кел” деп убара кылышат” деп айтышты. Мындай көйгөйдү жалгыз эле мага эмес, башка кесиптештериме да айтышкан экен, ошондуктан мен бүгүн маселе койдум. Биз банктардын жетекчилерин парламентке чакырып, маалыматын угушубуз керек. Эмне үчүн мамлекет тарабынан бөлүнгөн акча дыйкандарга жетпей жатат? Жазгы талаа жумуштары бүтөрүнө бир эле ай калды. Андан кийин ал акчалардын кереги жок болуп калат. Дыйкандар эгиндерин бирөөлөрдөн карыз алып эгишти. Себеби, аба ырайы күтпөйт.
-- Жазгы талаа жумуштарына канча каражат бөлүнгөн?
-- Ошол маалымат да бизде так эмес. Былтыр билем, 10 миллиард сом бөлүнгөн. Быйыл деле ошончо сумма деп айтышкан, бирок канчасы берилгенин так билбей жатабыз. Өзүбүздө маалымат жок. Эми эртең банктардын жетекчилери чакырылса угабыз го.
