ИИМдин башчылары жана эмгектин үзүрү
Өткөн жума этегинде ички иштер министрлигинин жыйындар залында эриш-аркак иштешкен жалпыга маалымдоо каражаттарынын өкүлдөрү сый урматка ээ болушту. Министр Улан Ниязбеков Кыргызстандан сырткары болгонго байланыштуу анын орун басары, милициянын генерал-майору Нурбек Абдиев бир топ журналисттерге ИИМдин төш белгисин, сый баракчаларын тапшырды. Албетте, жазмакер катары мындай сый-урматка ээ болушума абдан кубандым, төбөм көккө жетти.
Гезитибизге сан сайын болбосо да маал-маалы менен министрликтин жигердүү иштерин жазып турдук. Арийне системадагы айрым жетекчилерге карата сын пикирлер да болду. Кантсе да эл арасында жүргөн адам катары ар дайым байкоо жүргүзүп келем. Жылыштар арбын. Жакшы жакка өзгөрүлүп жатканы жүрөк жылытат. Милиция кызматкерлери менен элдин ортосундагы жакындык байкалууда. Ар дайым ушу калыбынан жазбай элге кызмат кылышса деген эле ниетим...
