Төлөнбек Абдыров, экономист: “Импорттук инфляция да өз ролун ойноп жатат”
-- Акыркы мезгилде азык-түлүк, коммуналдык кызматтар жана башка негизги керектөө товарлары кескин кымбаттап баратканы байкалууда. Бул эмне менен байланыштуу?
-- Бул маселе жөн жерден чыккан жок. Азыркы инфляциянын өсүшүнө бир нече фактор таасир этүүдө. Биринчиден, азык-түлүк жана электр энергиясы сыяктуу негизги товарлардын жана кызматтардын баасы кескин жогорулады. Экинчиден, импорттук инфляция да өз ролун ойноп жатат. Себеби, өлкөбүзгө товарлардын көпчүлүгү сырттан келет, бул түздөн-түз биздин рынокко таасирин тийгизет.
-- Карапайым эл үчүн мындай кымбатчылык кандай таасир этүүдө?
-- Эл бааны өз капчыгынан сезет. Мисалы, чачтарач кызматы эки эсе кымбаттады. Жарык, суу, жылуулук үчүн тарифтер өстү. Базардагы азык-түлүктүн баасы да күн сайын өзгөрүүдө. Бул түздөн-түз жашоонун кымбатташын билдирет.
-- Расмий маалымат боюнча инфляциянын темпи кандай?
-- 2024-жылы расмий инфляция 6,3% болгон. Ал эми 2025-жылдын май айында бул көрсөткүч 8%га жетти. Бул Улуттук банктын 5-7% деңгээлинен жогору. Бирок жылдын экинчи жарымында азык-түлүккө болгон баанын өсүшү жайлайт деген үмүт бар. Бул инфляцияны кайрадан көзөмөлдөп кармоого шарт түзөт.
"Азия Ньюс" гезити
