25 жаштагы жигит бир заматта өмүр менен кош айтышты
6-августта Кадамжай районунун Жаңы-Жер айылында (Ош–Исфана унаа жолунун 192-чакырымы) үч унаа кагышып, адам өмүрү кыйылды. Бул тууралуу бүгүн, 9-августта Баткен облустук жол кыймылынын коопсуздугун камсыздоо бөлүмүнөн билдиришти.
Маалым болгондой, Кара-Суу районунун Шарк айылынын 1996-жылы туулган тургуну М.М. «Хюндай Портер» үлгүсүндөгү унаасын айдап келе жатып, Өзбекстандын Риштан районунун 1976-жылы туулган тургуну Х.М. айдап келе жаткан «Т-28» үлгүсүндөгү трактордон ашып өтүүгө аракет кылган. Ошол учурда унаасы трактордун дөңгөлөгүнө тийип кетип, сол капталына оодарылып, каршы тилкеге чыгып кеткен. Андан кийин каршы тилкеде Баткен районунун Төрт-Гүл айылынын 1991-жылы туулган тургуну Н.Б. айдап келе жаткан «Тойота Эстима» үлгүсүндөгү унаа менен кагышкан. Кырсыктын кесепетинен «Хюндай Портердин» айдоочусу М.М. окуя болгон жерде мерт кеткен.
“Турмуш кж”
