Бактыбек Чойбеков, ЖК депутаты: “1,6 миллион автоунаанын 4-5 эле пайызы камсыздандыруудан өттү”
-- Бактыбек мырза, баягүнү комитетте автожарандык жоопкерчиликти милдеттүү камсыздандыруу (ОСАГО) боюнча мыйзам долбоору аябай кызуу талкууну пайда кылды. Бул боюнча сиздин көз крашыңыз кандай?
-- Жети нерсени булар милдеттүү түрдө камсыздандырууну сунуштап жатышат. Мисалы, турак жайды, автоунааларды. Бул мамлекет үчүн керектүү нерсе. Бирок, кечээки мыйзамды биз кабыл алсак, айып пулдар 2025-жылы 1-январдан күчүнө кирет. ОСАГОнун полисин албаган жарандарга 3 миң сомдон айып пул салынат. Мен ошого каршы болдум. Себеби, бүгүнкү күндө Кыргызстан боюнча 1,6 миллион автоунаа болсо, ошонун 4-5 эле пайызы камсыздандыруудан өттү. 1-январдан тарта айып пул салына баштаса, бул социалдык жарылууга алып келбейби (?) деген кооптонуумду айттым. Бул үчүн убакыт керек. Өкмөт тарабынан дагы элибизге жетиштүү деңгээлде түшүндүрүү иштери жүргүзүлгөн жок.
-- Анда сиз камсыздандырууга эмес, айып пул салуу жагына каршы турбайсызбы?
-- Жана айтканымдай, түшүндүрүү иштери жетишерлик жүргүзүлгөн жок да. Жаңы жылга чейин бир айга жетпеген убакыт калды. Автоунаа ээлеринин баары полис алып үлгүрбөйт. Мен комитетте айттым го, компьютерлериңер, серверлериңер өрттөнүп кетет деп... Буга чейин “укташты” да. Ошон үчүн иш жүргүзбөгөн кызматкерлерди да жоопко тартыш керек.
"Азия Ньюс" гезити
