Кубанычбек Жумалиевдин актанганы эсиңердеби? Эми куран уруп кетпейби?
“Бир Бол” фракциясынан депутат Кубанычбек Жумалиев мамлекеттин, элдин ырыскысын жебегенин айтып, куран алып карганганы жамы журтка маалым. Ал ошондон бери талкуудан түшпөй, УКМК февраль айынын башында камакка алып, ондогон объектилерин, үй мүлктөрүн ачыктап, жер жайнаган байлыктарын тизип салган. Эки айдай камакта жаткан Жумалиев акыры тергөө менен кызматташып, 1 миллиард сом мамлекеттин казынасына төгүп берди. Үй камагына чыкты. Бул көрүнүштөн улам эмнени түшүнөбүз? Анын айыптуу экенине, мамлекеттин эсебинен жеп-ичкенине көзүбүз жеттиби? Эмне үчүн Жумалиев күчтүү адвокаттарды жалдап, ак экенин далилдөөгө батынган жок? Сыягы, тергөөдө көп былыгы чыгып, буйтап кете албай калдыбы? Түшүнүксүз суроолор арбын. Иш жүзүндө күнөөлөрүн моюндап жатканы ушулбу? Айтмакчы, Жумалиевдин куран кармап актанып, карганганын кантебиз? Уруп кетпейби?..
"Азия Ньюс" гезити
