Министр Кендирбаеванын алсыздыгынан мугалимдер кордолууда
Соцтармакта хиджабчап аял класска кирип келип, оозунан “чирик сөзү” агылып, мугалимди тилдеп, ыйлатып аткан видео тарады. Коомчулукта талкуу жаралып, динге малынган “эки аяктууга” карата жек көрүүлөр козуду. Мугалимди кордоо, сыйлабастык өкүнүчтүү. Мындай шартта ИИМ мыйзамга жараша жазалоосу зарыл. Бул көрүнүш башкаларга да сабак болушу кажет.
Ал эми билим берүү жана илим министри Догдуркүл Кендирбаеванын алсыздыгы, мугалимдерге моралдык жактан колдоо, ишеним көрсөтө албаганынан ушундай ыплас окуялар кайталанып келет. Кыргызстандын баардык аймактарында, шаарларында радикал динчилдер кыздарын оронтуп-чулгантып, мектеп формасын кизгизбей, мамлекеттик эрежелерге акаарат келтиришүүдө. Тартип, ырааттуулук жок. Дайыма нарксыз ата-энелер тарабынан мугалимдер моралдык-психологиялык соккуларга кабылышып, убайым тартышууда. Эгерде ушул көйгөйгө каршы Кендирбаева катуу турганда, тийешелүү чечимдерди ала билгенде, албетте, жолго салынат эле. Тилекке каршы, министрдин кайдыгерлиги да жанга батууда.
Кыскасы, агартуучуларга карата азаптарды кан буугандай токтотуп, ИИМ, УКМК ашынган динчилдерди тыйышы керек. Биз светтик өлкөбүз! Ириде “сакалчан-оронгондордун” түшүнүгү эмес, мамлекеттин гана мыйзамдары үстөмдүк кылышы абзел.
"Азия Ньюс" гезити
