Атамдын сөөгү муздай электе “күйөөгө тий” деп кыстай башташты
Окуумду бүтүп шаарга бардым. Ал жактан бир бала менен таанышып, ал мени жолугушууга чакырды. Анан бир жума сүйлөшкөндө эле үйлөнүү сунушун киргизди. Ал мага анчалык жага бербейт, бирок дайыма гүл алып бергени кызыктырат. “Ойлонуп көрөйүн, убакыт бер” дедим. Ал “макул, ойлон” деди. Мен апама (өгөй апама) чалып, баарын түшүндүрдүм. Ал “макул тий, тийгениң жакшы болот, “макул” де, соодаң жүрүп атканда тийип ал” деди. Мен өзүм бир чечимге келе электе, ал тууган-уруктун баарына жайып ийиптир. Байкем, эжемдер “неге күйөөгө тийип атасың? Азыр эрте” деп каршы болушту. Туугандарыма жайылып кеткенине байланыштуу, “макул” дей бердим, “жок” дей албадым.
Ошентип тойго даярданып калдык. Эртең той деген күнү атам кайтыш болду. Оор акыбал... Аны жерге берип отуруп калган кезде өгөй апам мага “кудагыйлар чалды, “жакшылык ишти токтотпогула” деди” деп кулагымды жеди. Болбосо, атамды шылтоолоп тойду токтотоюн деп аткам. Эмнегедир жүрөгүм каалабай турат. Кандай кылсам?..
Таңсулуу