Кыргызстандын тышкы карызынын төлөө мөөнөтү узартылабы?
Кытайдын Экспорт-импорттук банкы Кыргызстандын эң ири кредитору. Карызыбыздын 45 пайызы, тагыраагы, 1,8 миллиард доллары дал ушул уюмга туура келет.
Кыргызстандын тышкы карыздар боюнча жеңилдиктерди берип туруу өтүнүчүн донорлор түшүнүү менен кабыл алган. Бул тууралуу маалымат жыйын учурунда вице-премьер Эркин Асрандиев билдирди.
Ага журналисттер "Кыргызстан карызын төлөө мөөнөтүн жылдырып берүү сунушун Кытай жана башка кредиторлор кандай кабыл алды?" деген суроо менен кайрылышкан.
"Кредиторлор түшүнүү менен мамиле кылууда. Өткөн аптада президент Кытай Эл Республикасынын лидери менен Экспорт-импорттук (“Эксимбанк”) банкынын алдындагы карыздын мөөнөтүн жылдыруу боюнча сүйлөшүүлөрдү жүргүздү. Билишимче, алар биз күткөндөй жооп берип, “Эксимбанктын” өкүлдөрү биздин адистер менен байланышка чыкты. Учурда иш башталды”, - деди Асрандиев.
