Искендер Шаршеев: “Экономикалык өзгөчө режим бизнести чочутууда”
Чет элдик инвесторлор ассоциациясынын аткаруучу директору менен маек.
-- Өкмөт тарабынан өлкөнүн экономикасына өзгөчө кырдаал режимин киргизүү сунушталды. Бул эмне болгон нерсе, түшүндүрсөңүз?
-- Дүйнөлүк экономикада мындай кырдаалдар сейрек кездешет. Негизи экономикадагы өзгөчө кырдаалдар деген нерсе жаңылык. Мындай жагдай көбүнчө алааматтар, согуш же ушул сыяктуу кризис болгондо жарыяланат эле да. Экономикалык режимдерге окшош, бирок аталышы башка жагдайлар Түштүк Корея, Камбоджа, Кытай сыяктуу өлкөлөрдө болгон.
-- Бул режимге бизнес чөйрөсү кандай баа берип атат?
-- Бизнесмендер аябай кооптонууда. Анткени “бул режимдин артынан салыктар көбөйбөйбү?” деген суроо ачык калды. “Карапайым элдин жашоосуна бөгөт коюлбайт” дегенге кепилдик жок. Ошон үчүн бизнес чөйрөсү бул мыйзамды тереңирээк түшүндүрүүгө кошумча убакыт берүүнү же таптакыр жокко чыгарып салууну президенттен суранганы жатабыз.
-- Сунушталган мыйзамдын негизинде экономикада кандай өсүштөр, өзгөрүүлөр болот экени белгилүүбү?
-- Ал жөнүндө так айтылган эмес. Аякта жалпыланган функциялар, өзгөчө ыйгарым укуктар өкмөткө берилери көрсөтүлгөн. Эгер чындап экономиканы көтөрүү керек болсо, анда башкача мыйзам чыгарышса болмок. Маселен, жаңы ишканалардын түрлөрүн ачууга, инвестиция тартууга мүмкүнчүлүктөр түзүлүп, салыктык эркиндик берилсе, өкмөттүн аракети түшүнүктүү болот эле.
Мээрим Асанова
"Азия Ньюс" гезити
