Германияда 50 миң кыргызстандык ишке орношо алат
Германияда Кыргызстандын 50 миңге чейин жаранын алпарып ишке орноштурууга мүмкүнчүлүк бар. Бул жөнүндө бүгүн Бишкекте Германия менен Кыргызстандын биргелешкен бизнес форумунда Кыргызстандын Германиядагы элчиси Өмүрбек Текебаев билдирди.
"Германияда расмий маалымат боюнча он миң, расмий эмес маалыматтар боюнча 25 миңге жакын кыргызстандыктар бар. Биз тийешелүү долбоорго кол коюшуп алсак, жакынкы беш-алты жылда элүү миң адамды ишке жибергенге мүмкүнчүлүк бар" деди Өмүрбек Текебаев.
Бишкекте "Германия экономикасынын күндөрү" деп аталган бизнес-форум жана Кыргыз-Герман ишкер кеңешинин биринчи отуруму өтүп жатат. Бул форум Германияда Россияга салынган санкциялардын шартында газ, мунайдын баасы асмандап, ал эми Кыргызстандын экономикасын рецессия тооруп турган убакта болуп жатат.
Россияда эл аралык санкцияларын кысымы менен көп чет элдик компаниялар ишин токтотуп, иш орундары кыскарып жаткан убакта, кыргыз мигранттары үчүн Европа багытында жакшы мүмкүнчүлүктөр түзүлүүдө. Кыргыз жарандарын кыска мөөнөттүү жумуштарга жиберүү жөнүндө Финляндия, Болгария, Германия менен келишимдерге кол коюлганы жатканын эмгек, социалдык камсыздоо жана миграция министрлиги да билдирген эле. Ал эми Британиянын компаниясы ушул жылдан баштан кыргызстандык жарандарды биринчи жолу айыл чарба жумуштарына алып жатат. Жумушчулардын биринчи партиясы Британияга май айында жөнөп кеткени белгилүү.
