“Татынакай такай...” икаясы. Текебаев эмнеге кубарып кеткен?
Аскар Акаевдин бийлиги доорунда Тыныбек Алыкулов 1995-жылы мандатка жетип, андан кийин бир катар мамлекеттик кызматтарды аркалаган эле. Кийин көзү өтүп кетти. Ошол киши эл өкүлү кезинде тамашалуу икаяга аралашып калыптыр, эмесе кеп салалы. “Бура сүйлөгөн күлгөнгө жакшы” дейт.
Машинада жаш депутаттар Тыныбек Алыкулов, Өмүрбек Текебаев, Иса Өмүркулов жана Туйгунаалы Абдраимовдор баратышат. Жолдо ката эшектин коделеги көзгө урунат. Кайсы гана жандык болбосун, кичинекейи кооз көрүнөт эмеспи. Тыныбек Алыкулов күтүүсүздөн эле:
-- Татыкакай такай экен э? - дейт.
-- Аны силер жакшы билесиңер да... - деп Иса Өмүркулов чукугандай сөз таап салат.
Куйкум кептен улам, теңтуштар арасында кыраан-каткырык орнойт. Бирөөсү гана бозоруп чыгат... Аңгыча эле Туйгунаалы Абдраимов:
-- Өмүке, сага эмне болду? - деп капталга нукуганга жетишиптир.
Өмүрбек Текебаев болсо купкуу тартып, такыр сүйлөбөй, жолду уланта берет. Ошентип, жанындагы коллегалары тамашаны көркүнө чыгарышып, чер жаза күлүп алышканын эшиттик.
"Азия Ньюс" гезити
