Түштүкизация: Мамытов, Ташиев, Зулушев, Аманбаев – региондук баланс бузулдубу?
14-ноябрдан баштап Садыр Жапаров буга чейин ээлеп келген кызматтарын өткөрүп берип, шайлоого аттанат. Ошондо парламенттин спикери Талант Мамытов президенттин милдетин аткаруучу болуп калат (эң жогорку эки креслону ээлеп). УКМК төрагасы Камчыбек Ташиевдин таасири артып турса, башкы прокурор Курманкул Зулушев жана өкмөттүн аппарат башчысы Бакыт Аманбаев дээрлик бийлик бутактарына көзөмөл кылышууда. Эске салсак, кайсы гана бийлик болбосун, жогорку кызматтарга кадрларды дайындоодо региондор аралык балансты кармап, калыстыкка аракет кылышчу. Учурда үлкөндөрдөн Талант Мамытов, Камчыбек Ташиев, Курманкул Зулушев, Бакыт Аманбаевдер түштүк регионунан болушат. Мамлекетти тескөөчү негизги “рычагдар” мына ушуларда. Кандай болгон күндө да, достордун бийлик жүргүзүүсү күч алды. Башкасын мисал келтирбесек дагы, Чүйдө 1 миллиондон ашык эл жашайт. Эмне үчүн бул региондон көрүнүктүү лидер чыкпай калды? “Боёосу канды...” дегендей, биз белгилеген катачылыкты мындан ары эске алгыла! Мансап-байлык колдун кири, бүгүн бар да эртең жок. Адилеттүүлүк, калыстык өкүм сүргөндө гана бийликтин пайдубалы бекем болорун унутпагыла! “Түштүкизация” термини керек беле?..
"Азия Ньюс" гезити
