Ош мэри Бакыт Жетигеновго жергиликтүү депутаттар кайсы оюндун күүсүн чертип атышат?
Ушундай. Ош шаардык кеңешинин төрагасы Салман Назылбеков жана көпчүлүк депутаттар мэр Бакыт Жетигеновдун артынан компромат жыйнашып, көшөгө артынан оюн башташканы каңкууланды. Азырынча коомчулукка ачык чыгууга батына албай жатышса керек. Чатактын чыгышына “Классик” мейманканасына түштөндүрүү тамагы боюнча мэрия тарабынан буюртма берилгени, бул боюнча эки ача пикирлер жаралганы айтылууда. Бакыт Жетигеновдун атынан мурда чуулгандуу иштерге аралашкан Абдышүкүр Жураев “Классиктин” кызматкерлерин коркутууга алганбы? Ушул боюнча депутаттар маселе көтөрүшүп, мэрди кетирүүгө пландарын мелжешкени кандай? Жогору жактан лөктөр кызыкдар болгону үчүн “чукушмай” башталган окшойт...
Ал эми Бакыт Жетигенов кызматын татыктуу аркалап, пайдалуу иштерди жасап жатканы коомчулук тарабынан сыпатталып келет. “Медалдын эки бети бар” демекчи, ички оюндарды ачыктоо үчүн күрөшүү мезгили келдиби? “Токмогу күчтүү болсо, кийиз казык жерге кирет” дегендей, акырында Ош шаардык кеңешинин депутаттары Бакыт Жетигеновго ишенбөөчүлүк көрсөтүшүп, кызматтан кетирүүнү демилгелеп чыгышты. Мыйзамда көрсөтүлгөндөй, мэрди президент дайындайт, жумуштан да өзү алат. Ал эми эл өкүлдөрү кайсы оюндун күүсүн черте башташты?..
"Азия Ньюс" гезити
