Төрага Нурланбек Шакиев жөн жерден президенттик креслону кыялданбаса керек
“Өрдөк жокто чулдук бий” дегендей, татыктуулар түрмөдө, же саясаттан сырткары жүргөндө Нурланбек Шакиев парламенттин спикери катары иштеп атат. Ар бир бийликтин тушундагы Жогорку Кеңешти мисал кылсак, дайыма ортозаар депутаттар төргө чыгып келиптир. Төрага кейиптенип. “Пластинканы” артка түрдүрүп көргүлө. Эстедиңерби? Курманбек Бакиевдин кандуу режиминдеги Айтибай Тагаевдин көтөрүлгөнүн, андан берки “кашкалдактарды” айтпай эле коёлу. Жашоонун жасалма мыйзамы ушундай тура. Адамдын көзү эч нерсеге тойбойт эмеспи, өзгөчө саясый амбициянын чеги жок. Маселен, Нурланбек Шакиев төрага болгонуна алымсынбай, кийинки президенттик шайлоодо атсалыша турганын, оомат оосо кыргыз элин башкарарын кыялданган кербезиби? Анын жакын адамдары бекер жерден ажо болорун айтышып, делбектеп жатышпаса керек. Ошондо Шакиев назилинде Ташиевге каршы чыгып, так талашып, оппонент болобу? Саясаттын азгырыгы деги эмнеге алып барбайт? Көрө жаталы.
"Азия Ньюс" гезити
