Элвира Сурабалдиеванын катасын Ибраим Нуракун уулу оңдоду
30-апрель күнү Жогорку Кеңеште өзгөчө абал режимин токтотуу же узартуу маселеси караларын депутат Элвира Сурабалдиева социалдык тармактагы баракчасына жазды.
“Жогорку Кеңештин жыйынында өзгөчө абалды токтотуу же узартуу маселеси талкууланат. Өкмөткө парламент бере турган суроолору көп. Чогулган каражаттардын сарпталышы, жарандарга, ишкерлерге мамлекет тараптан кандай жардам болот, сыртта жүргөн жердештерибиздин акыбалы тууралуу”, - деп жазылган постто.
Ал эми парламенттин маалымат кызматынын жетекчиси Ибраим Нуракун уулу ӨА режимин узартуу же токтотуу боюнча маселе азырынча күн тартибине кире электигин, баардыгы алдыңкы күндөрдөгү коопсуздук кеңешинин жыйынынан кийин белгилүү болорун билдирди. Ал эми ЖКнын депутаты Дастан Бекешов “өлкөгө жарыяланган өзгөчө абалды узартуу керек” деп демилгелөөдө. Бул пикирин “Кактус” медиага билдирген.
