Оор кылмыш иштери козголгон, издөөдө жүргөн Юруслан Тойчубеков эл көзүнө чыга баштады
Жакында УТРКнын маданият каналында акын, драматург Сейит Алтымышевди эскерүү болду. Жакшы уюштурган программа экен, бирок берүүнү бузган бир өкүнүчтүү көрүнүштү эске алалы. Ошол көрсөтүүдө “элге эшектин этин жегизгендерге катыштыгы бар” деп айыпталып, ал чатагы бүтө электе “Элдик лотереясы афера экен” деген чатак чыгып, үстүнөн “Коррупция”, “Кызмат абалынан кыянаттык кылган” деген беренелер менен кылмыш иши козголуп, өлкөдөн качып чыгып кеткенден кийин Интерпол аркылуу эл аралык издөө жарыяланып, кармалбай жүргөн Юруслан Тойчубеков маңкайып отурат. “Укмуштуунун төөсү жорго” деген ушул эмеспи! “Эл аралык издөөдө жүргөн киши мен, көрүп алгыла” дегенсип теле аркылуу сүйлөп жатса, “бизде көзөмөл органдары эшек такалап жүрөбү?” деген ой келди. Таанышы “танкалар” мыйзамды тебелей берсе жарашабы? Түшүнүксүз...
"Азия Ньюс" гезити
