Мурат Боронов генерал-майорду алса, ИИМдин аброюна шек кетет
Баткен ОИИБ начальниги Мурат Бороновго Акүйдөн генерал-майорду бергени жатыптыр. Бул боюнча ишенимдүү булагыбыз билдирди. Таңгаласың. Кайсы эмгеги үчүн? Көрсө, кызыгың түшкүрдүн суу кечпеген бир логикасы ойноп кетиптир. Эгерде Бороновдун чин-даражасы көтөрүлсө, тажиктердин генералдары менен теңата сүйлөшүп, чек ара маселесин чечкенге салым кошот имиш. Ушу кантип болсун? Чобурга бапестеп жабуу жапканды элестетип кеттиңерби? Эрксизден баш чайкайсың да. Милициялар ичинде Мурат Боронов билими, тажрыйбасы начар, ортозаар кызматкер катары бааланат. Убагында Төрөбай Зулпукаров жердешчиликке салуу менен гана көтөрүп койгон. Анан калтасын толтуруп алыптыр, ошонун артынан эле сакталып келатат. Ал Баткенге барганы көзгө көрүнүктүү иш жасаган жок. Айдатма, эптеп гана жүрөт. Эгерде татыксыздарга генерал наамын тарата берсек, ИИМдин баркы тебеленип, күлкүгө калабыз го? Андан көрө Баткен ОИИБ начальнигине толгон генералдардын бирин тандап жөнөтсө не? Же элдин элегинен өткөн, ишбилги полковникти дайындап, мына ошого генерал-майорду бергиле! Андай кадр ИИМде бар.
"Азия Ньюс" гезити
