Дастан Бекешов: “Орус бийлигин, Путинди сындабагыла!”
Жогорку Кеңештин депутаты Дастан Бекешов жакын арада Россияга барууну көздөгөн кыргызстандыктарды орус бийлигин сындабоого чакырды. Мындай билдирүүнү ал Телеграмдагы каналына калтырган.
“Жакынкы айларда же жыл ичинде Россияга барууну же Россия аркылуу өтүүнү көздөп жатсаңыз, орус бийлигин, Путинди же Россиянын элчилигин сындабоого чакырам. Анткени Госдума Россиянын мамлекеттик түзүмдөрүнүн иши тууралуу фейк маалыматтарды тараткандарды жазага тартуу боюнча мыйзамды кабыл алды. Орус депутаттары “сындасаңар болот, анткени элчилик начар иштеп жатат” дешүүдө. Бирок ага карабай кандайдыр бир маселелерден оолак болуу үчүн бул кырдаал боюнча жазбоону сунуштайм” деген депутат.
Мындай чакырыгын ал Кыргызстандын географиялык абалынан улам Россияга муктаждыгы менен түшүндүргөн.
“Азырынча Россия аркылуу Европага же башка жакка каттамдар болбошу мүмкүн, бирок ошентсе да кандайдыр бир нерселерди айтуудан карманууга чакырам. Эмне болсо да биз, кыргызстандыктар этият болгонубуз жакшы” дейт депутат.
