Жаңылануу башталабы? ИИМдин орун басарлары ойдогудай болбой жатат
Аргымак камчы салдырбайт эмеспи. Анын сыңарындай, ички иштер министри Улан Ниязбеков коомдук-коопсуздук кырдаалга алдын ала анализ жасап, тартипти, тынчтыкты камсыздоо жагынан кыйла тажрыйбалуу экенин көрсөтүүдө. Республика боюнча жасалган кылмыштарды ачууда, каршы күрөшүүдө ыкчам чараларды багыттап, сергектигин айгинелей алды. Өздүк курамдын астында аброю көтөрүлдү. Бирок, “медалдын экинчи бети бар” дегендей, ИИМдин орун басарлары иш жүзүндө профессионалдуу жактарын көрсөтө алышпай, жетекчинин гана оозун карап отурушканы, өз алдыларынча демилге, идеялардан аксашканы жашыруун эмес. Мындай “айдатма” эргулдарды жазга чейин тазалап, иштин көзүн билген, билимдүү, тажрыйбалуу кадрлар менен алмашпаса, министрге күч келип калат го? Жогору жактагылар деле орун басарлары ойдогудай болбой жатканын байкап атышыптыр. Чечкиндүүлүк керек. Быйыл ИИМдин кадр саясаты жаңыланып, үлгүлүү өзгөрүүлөр жасалса, милициянын кадыр-баркы дагы көтөрүлөт эле.
"Азия Ньюс" гезити
