Мэр Токторбаев губернатор Жантаевди чүнчүтүп салдыбы?
Күнү-түнү күркүрөп иштеп аткан мэр Жеңишбек Токторбаев коомчулуктун көңүл борборунда. Алкагандар да арбын, сындагандар дагы болууда. “Беш кол тең эмес” дегендей. Резонанстуу дымак жаратып, кызыл сызыктан чыгып кеткен үйлөрдү, имараттарды тегиз жылдырууга киришкени, мамлекеттин жерин басып алгандардын жүзүн ачканы (Мырзакматов сыяктууларды), жетекчилерди кагып-силкип, тартипти катуу кармаганы, айтор, баардык тарабынан оозго алынып атканы маалым. Ооба, Жеңишбек Токторбаев чоң тобокелдикте баратат. Баштаган ишин аягына чыгаруу үчүн эрки жетеби? Көпчүлүк ушул өңүттөн байкоо салууда... Кызыгы, бул жакта ушундай машакат болуп атса, Ош облусунун губернатору Элчибек Жантаев өзүнчө чүнчүп, кабинетинен чыга албай калдыбы? Мэр Токторбаевдин көлөкөсүнөн көрүнбөй, жүүнү бош экени, эмгекке жарамсыздыгы кашкайдыбы? Экөөнүн ишмердиги асман-жердей го? Элчибек эптей албаса, кызматты кор кылбай кете бербейби? Ооба, келечекке карай дагы олуттуу суроолор кабыргасынан коюлат.
"Азия Ньюс" гезити
