Эдил Байсалов тышкы иштер министри болобу?
Вице-премьер-министр Эдил Байсалов дипломатияда тажрыйбасы бар, Лондондо ийгиликтүү элчи болгону менен бааланып келет. Агездеги министр Руслан Казакбаев да тар чөйрөдө жогорку деңгээлде мактап, эл аралык алкактагы профессионалдуулугуна суктаныптыр. Ал эми өткөн чак. Учурдагысын алсак, айрым кыраакы дипломаттар Эдил Байсаловго жогору баа беришип, тышкы иштер министри болсо, ырааттуу саясат жүрөрүн, ыргылжыңдык жоюларын айта башташыптыр. Ошого катар инвестициялык климат жакшырарын да кошумчалашты. Ал эми азыркы министр чыныгы адистерге эмес, жердешчиликке ыктап, көңүлүнө жаккан кадрларды сүрөгөнгө маашырланып, ошону менен убактысын өткөрүп калганын кабарлашты. Кыскасы, Эдил Байсаловдун вице-премьерликти аркалаганына үч жыл толуптур, эми орун алмаштырып, ТИМди жетектесе, чын эле “сазга баткан” бул тармакты көтөрүп кетет беле?..
"Азия Ньюс" гезити
