Тышкы иштер министри Жээнбек Кулубаев саясый ката кетирдиби?
Кыргызстандын тышкы иштер министрлигинин 80 жылдык салтанатында улуттук филармонияда президент, Жогорку Кеңештин төрагасы баштаган мамлекет жетекчилиги катышкан мааракеде тажиктердин кайдагы талаа командири Шох Искандарды чоң фигура көрүп, мамлекет башчылардын деңгээлине көтөрүп, ролун, ордун бийиктетип жатканы туура болбой калды. Өтө калпыстык, өкүнүчтүү!
Бул Шох жакында эле эки жолку Баткендеги чек ара согушунда Афганистандан моджахеддерди, эски тааныштарын алып келип, өзү баштап кыргыздын жерине куралы менен кирбеди беле? Анан бул кишинин сүрөтүн биздин залкарыбыз Чыңгыз Айтматов менен бир рамкага салып, элдин баарына жарыя кылып, филармонияга көргөзмөгө коюп жатканыбыз кандай?! Жээнбек Кулубаев министр катары 80 жылдыкта ушундай олуттуу ката кетирбей, карап коюшу керек эле.
Анысы аз келгенсип, Жээнбек Кулубаев ажо Садыр Жапаровду ээрчитип, ошол көргөзмөнү көрсөтүп жүрдү. Муну көргөн тажиктер, элчиси күлүшүп, “биздин баатырдын кыргыздардын улуттук филармониясында сүрөтү илинип, көргөзмөдө орун алып жүрөт” дейт го? Намыс болуш керек да. Шохтун жасоолдорунан запкы көргөн баткендиктер эмне дейт?..
"Азия Ньюс" гезити
