Курал Чокоев: “Мен Бишкекте элемин. Башка өлкөгө кетүүгө оюм да жок”
Ырчы Курал Чокоев чет элдик долбоорду кайталайм деп коомдун сынына кабылып, талкуу чордонунан түшө элек. Анын дарегине жакшы да, жаман да пикирлер айтылып, алтургай ырчынын чет өлкөгө чыгып кеткени айтылууда.
Жогорудагы кептин чын-бышыгын билүү үчүн ырчы мырзага байланышканыбызда төмөндөгүлөрдү билдирди.
"Мени башка өлкөгө кетти деген туура эмес. Эч жакка кеткен жокмун, Бишкекте элемин. Башка өлкөгө кетейин деген оюм да жок. Долбоорубуз токтотулду, тартылбайт, видеолор дагы өчүрүлдү. Баары жайында", - деди ал.
Артисттин бул долбоорунун айрым үзүндүлөрүн маданият, маалымат жана туризм министри Нуржигит Кадырбеков аргасыздан көргөнүн, ырчы эмнеге мындайга барганын түшүнө албай жатканын айтып, элден кечирим сурады. Ошондой эле Курал Чокоев менен Кайрат Примбердиевдин чыгармачылыгына чектөөлөр киргизилерин айтты.
Ырчы айтылып жаткан сындардын баарын кабыл аларын, кетирген каталарынын үстүнөн иштей турганын айтып, долбоорду тартууну улантарын билдирген. Кийинчерээк, ырчы долбоор токтотулганын, буга чейин интернет желесине жарыяланган видеолор өчүрүлөрүн айтып чыкты. Ал эми долбоордун коногу болгон шоу-бизнес өкүлдөрү өздөрүнүн пикирлерин билдиришти.
