Акыркы кабарлар
» Коом » Бишкектеги булганган аба ички органдарды жабыркатып, жүрөктү алсыратат
Бишкектеги булганган аба ички органдарды жабыркатып, жүрөктү алсыратат
19-декабрь, 09:50
Кыш мезгилинде абанын булганышы бир гана өпкө ооруларына алып келбестен, ички органдарды жабыркатып, жүрөктү алсыратат. Мындай бүтүмгө британиялык 175 дарыгерден турган топ келгенин чет элдик басылмасы жазды.Шаардагы ыш адамдын дем алуу системасын жабыркатып, жүрөк кан-тамыр кемтиги, инсульт, кант диабети, депрессия сыяктуу илдеттерге алып келет. Ошондой эле адистер кара түтүн өпкөдөн ылдый жайгашкан көк боор, ашказан, өт, сокур ичеги, түз ичеги сыяктуу органдардын ишин бузарын айтышты.
Абанын булганышы боюнча көйгөй акыркы жылдары Бишкек шаарында дагы күчөп келе жатат. ӨКМ быйылкы жылдын ноябрь айында Бишкектеги атмосфералык абалга байкоо салып, абада зыяндуу заттардын пайда болушу нормадан жогорулап кеткенин айткан. Өкмөт абанын булгануусуна автоунаалардан чыккан түтүндү негизги себеп катары сыпаттап келет. Ал ортодо Бишкек мэриясы абанын булганыч экенин моюндап, организми сезимтал адамдарды бет кап кийүүгө чакырган.
Эскерте кетсек, 17-декабрда шаардын четине чыгып, борбордун үстүн жапкан капкара түтүн тууралуу видео коомчулукка тараган эле. Бул видеодо Бишкектин үстүндөгү кара тумандан калаа таптакыр көрүнбөйт, кара казан жабылып тургандай абалда экенин көрүүгө болот.
Aryba.kg
