Мирлан Самыйкожо, ЖК депутаты: “7-апрелди жокко чыгарып, ага терс мамиле кылуу – өтө чекилик иш”
-- Мирлан мырза, 7-апрелди календардын кызыл күнү катары белгилөө маселеси комитетте бир топ талаш-тартыштарды туудурду. Бул боюнча сиздин көз карашыңыз кандай?
-- Бул жөнөкөй майрам эмес, биздин Кыргызстандагы тарыхый күндөрдүн бири. Муну бүгүн 90 же 100 киши жокко чыгарып алып койгон менен, эртең келечекте эл кайра ошол күндү эскерүү кылып, ата-бабаларга таазим кылчу дата катары улантары бышык. Анткени, бул жерде авторитардык бийликке каршы болгон кыргызстандык жүздөн ашуун адамдын өмүрү кыйылган. Жапжаш бойдон кетишкен. Аларды биз кечээ даңазалап, “Ата-Бейиттеги” Айтматовдун, репрессия курмандыктарынын жанына койгонбуз. Анан эми бүгүн кайра 7-апрелди жокко чыгарып, ага терс мамиле кылуу – бул өтө чекилик болот. Бул тарых, ал эскерилиши керек. Менин оюм ушундай.
-- Анда майрам эмес, эскерүү күнү катары белгиленгени туура болот го?
-- Майрам деген эч ким жок. Эскерүү күнү катары ошол жерге гүл коюлуп, урмат көрсөтүлүүгө тийиш. Өткөндөр даңкталмайын тирүүлөр баркталбайт. “Өткөндөрүн эстеген – өскөндүктүн, өткөндөрүн жектеген – өчкөндүктүн белгиси” дейт кыргыз. Өткөндөрдүн баарын унутуп, тарыхты жок кылсак, анда кандай эл, кандай мамлекет болобуз? Эгемендүүлүк алгандагы тарыхыбызга да баам салып, карап көрүшүбүз керек да.
"Азия Ньюс" гезити
