Бейшенбек Абдразаков, экс-депутат: “Араб “джипке” минди, кыргыз “итке” минди”
-- Бейшенбек мырза, бийлик кымбатчылык күч алган үчүн пенсияны жогорулатууга аракет кылып жатабы?
-- Бийлик кымбатчылыкты эске алып, пенсияны 6800 сом кылып көбөйтөбүз деп аракет кылууда. Ошондой эле элди жакырчылыктан чыгарыш үчүн соцкелишим аркылуу көп жарандарга чакан бизнес ачып берип жатат. Соцкелишимден каражат алгандар ачкан бизнесин жакшы иштетип, бутуна туруп кетишсе, көп адамды жакырчылыктан чыгарып кетет деп ойлойм.
Жалпы элибизди жакырчылыктан чыгыш үчүн комплекстүү, туруктуу 20-30 жылдык улуттук долбоор иштеп чыгып, ошону ишке ашырыш керек. Мен курултайда ушундай сунуш бергем:
Кудай байысын деп арабга мунай, кыргызга суу берди. Араб “джипке” минди, кыргыз “итке” минди. Кыргыздын арабдан эмнеси кем? Келгиле, абалдан чыгуунун жолун издейбиз.
-- Кыргызды жакырчылыктан чыгарып, байытуунун жолу барбы?
-- Бар. Ар бир үйгө күн батареясын, шамал электростанциясын, биогаз жабдыгын орнотуш керек. Ошондой эле 452 айыл өкмөткө 5-6дан чакан ГЭС, ар бир үйгө бирден скважина орнотсок, кыргыз байыйт. Ошондо кыргыздар Кудай берген ырыскыны, сууну туура пайдаланат. Элибиз бейиштегидей жашап, периштеге айланат.
"Азия Ньюс" гезити
