Туура эмес тамактануу, аз кыймылдуулук инсультка дуушар кылат
2006-жылы бүткүл дүйнөлүк инсульт менен күрөшүү уюму (World Stroke Organization, WSO) аталган илдет жөнүндө коомдун маалымдуулугун жогорулатуу максатында “29-октябрь – бүткүл дүйнөлүк инсульт күнү” деп жарыялаган.
Инсульт – бул мээдеги кан айлануунун кескин түрдө бузулушу. Жүрөк кан тамыр ооруларынан улам келип чыгат. Инсульт мээдеги тамырлардын бири жарылгандан же кан тамырдын бир жеринде кан уюп, тамыр бүтөлүп калгандан улам пайда болот. Мындайда мээ ткандарынын жана мээнин иштеши начарлайт. Инсульт геморрагиялык (мээге кан куюлуу) жана ишемиялык (мээнин инфаркты) болуп бөлүнөт.
Дүйнөдө жыл сайын инсульттан 6 миллиондон ашуун адам каза болот. Эксперттер жүрөк кан тамыр ооруларынын келип чыгышына туура эмес тамактануу, аз кыймылдуулук, ичкилик ичүү жана тамеки чегүү себеп болорун айтышат.
