Суракка чакыртылган Космосбек Чолпонбаевдин ооруп калганы айтылууда
Мурунку саламаттыкты сактоо министри Космосбек Чолпонбаев ооруп калгандыгына байланыштуу сурактарга убактылуу катыша албайт. Бул тууралуу жергиликтүү басылманын булагы билдирди.
Маалыматка ылайык, мурдагы чиновниктин диагнозу такталып жатат.
Эске сала кетсек, буга чейин Финполиция тарабынан Саламаттыкты сактоо министрлигиндеги айрым кызмат ээлеринин кээ бир фармацевтикалык компаниялардын кызыкчылыгын көздөп, коррупциялык иштерге баруу фактысы аныкталгандыктан Космосбек Чолпонбаев суракка чакыртылган. Ал эми бүгүн экономикалык кылмыштарга каршы күрөшүү кызматы мурдагы вице-премьер-министр Алтынай Өмүрбекованы да суракка чакырганы маалым болду.
Айрым ЖМКлардын айтымында, Космосбек Чолпонбаев медициналык багыттагы буюмдарды чет өлкөлөргө саткан деп шектелүүдө.
NazarNews.kg
