Якутияда каза болгон беш кыргызстандыктын сөөгү ошол жерге токойго коюлган
Якутияда каза болгон кыргызстандык жарандар жергиликтүү мусулмандардын көрүстөнүндө жерге берилген. Бул тууралуу 10-июлда Кыргызстандын Россиядагы элчилиги “Супер” сайтына билдирген.
Буга чейин Россиядагы басылмалар Якутск шаарындагы токойдо Борбор Азиядан келгендердин сөөгү жашырылган көрүстөн табылганын жазып чыгышкан. Тергөө комитети бул факт боюнча текшерүү иштерин баштаган болчу.
Дипломатиялык өкүлчүлүктүн маалыматы боюнча, аталган жайга кыргызстандык 5 адамдын (төртөө Кыргызстандын жараны, бири Россиянын жарандыгын алган кыргызстандык киши) сөөгү коюлган.
«Сөөктөрдү жерге берүүгө тиешелүү уруксат жана документтер бар болгон», - деп айтылат маалыматта.
Аталган көрүстөндүн аймагы өз убагында тосулбай калган. Акыркы маалыматтар боюнча, Саха Республикасынын (Якутия) мусулмандар дин башкармалыгы көрүстөндүн аймагын тазалап, ага баруучу жолду оңдоп, таштандыларды чыгарды.
«Мусулмандар дин башкармалыгы дайыма көрүстөндүн аймагын карап жана аймакка таандык алуу боюнча документ тапшырганын билдирди», - деп айтылат элчиликтин маалыматында.
