Бөдөш Мамырова, экс-депутат: “Ташиев менен Зулушевдин ортосунда тирешүү жаралбайт”
-- Бөдөш эже, акыркы мезгилде түрдүү сөздөр чыга баштады. Айрымдар “Садыр Жапаров менен Камчыбек Ташиевдин мамилеси солгундап, таарынычтар жаралды” дегенди ишенимдүү айта башташты. Чын эле таарынышып кетиши мүмкүнбү?
-- Экөөнүн мамилесинин солгундап кетишине негиз деле жок. Айтылып жүргөн күмөн саноо, божомолдор кезектеги имиш кептер го. Негизи экөөнүн мамилесинин бузулушун каалаган, кызыкдар болгон тараптар бар окшойт. Анткени, маал-маалы менен коомчулукка маалымат ыргытып, “мамилелери солгундап калыптыр” деген пикир жараткысы келгендер бар. Албетте, жумуш болгондон кийин талаш-тартыш болот, бирок “экөө эки жакты карап кетти” дегенге негиз жок, андайга жол беришпейт. Таарынышкандай эмне талашы бар? Кызыкчылыктары бирдей, бир багытта эле бараткандай, өтө деле ажырым сезилбейт...
-- Камчы Көлбаевдин УКМК тарабынан атылганын, мыйзамдуулугун аскер прокуратурасы териштирип атканын президент жарыя кылды. Мунун айынан Ташиев менен Зулушевдин тирешүүсү жаралбайбы?
-- Албетте, акпы-карабы, адам өлүмү катталды, болгондо дагы атайын кызматтын жүргүзгөн операциясы боюнча. Териштирүү иштеринин жүргүзүлүп атканы мыйзам ченемдүү эле көрүнүш. “Аскер прокуратурасы иликтегени үчүн экөөнүн мамилеси бузулуп, тирешүү жаралат” деген болбогон кеп. Анткени, Ташиев да, Зулушев дагы иштин тыкыр иликтенип, мыйзамдуу баасын алышына кызыкдар. Ошон үчүн болуп өткөн окуяны терең түшүнүү менен коомчулуктагы ар кандай такталбаган маалыматтарга чекит коюу үчүн аскер прокуратурасы иликтегени туура эле.
"Азия Ньюс" гезити
