Өлкөдө күйүүчү-майлоочу майдын баасы улам төмөндөй берери айтылды
Кыргызстанда күйүүчү-майлоочу майдын баасы беш сомго чейин арзандашы мүмкүн. Бул туурасында Кыргызстан нефтетрейдерлер ассоциациясынын аткаруучу директору Канат Эшатов “Спутник” сайтына маалымдаган.
Анын айтымында, ассоциация өкүлдөрү Финпол жана салык кызматы менен сүйлөшүп, коронавирус пандемиясынын баага тийгизген таасирин түшүндүргөн.
Кыргызстан мунай менен үзгүлтүксүз камсыздалат, ага таңсыктык жаралбашы керек. Ири нефтетрейдерлер мунайды дээрлик эки айга жете турган запас менен сатып алышкан. Пандемия жарыялана электе башкача баа болчу. Ошондуктан бааны дароо түшүрүп жиберүү мүмкүн эмес.
“Нефтетрейдерлер өлкөдө күйүүчү майдын баасын этап-этабы менен арзандатууга белсенип жатат. Жакынкы күндөрү чекене баасын беш сомго чейин түшүрөбүз. Андан кийинки динамика республикадагы экономикалык ишмердүүлүктүн активдешүүсүнөн көз каранды болот”, - деп белгилеген Эшатов.
