Күз мезгилинде организмди чыңдоого жардам берген азыктар
Адистердин айтымында, күзүндө организмди колдоо үчүн туура жана пайдалуу тамактанууга көңүл буруу маанилүү. Рационго пияз, сарымсак, ашкабак, туздалган капуста, бал азыктары жана жашылчаларды кошсо болот.
Пияз жана сарымсак курамындагы фитонциддер, эфир майлары жана кверцетин менен пайдалуу. Кверцетин антиоксиданттык жана сезгенүүгө каршы касиетке ээ.
Ашкабак организмге керектүү бета-каротинге бай. Ал организмде А витаминине айланып, иммундук системанын нормалдуу иштешине маанилүү роль ойнойт.
Туздалган капуста ичегидеги пайдалуу бактерияларды колдогон пробиотиктерди камтыйт. Ал эми ичеги-карындын микрофлорасы организмдин жалпы абалы жана иммундук функциясы менен тыгыз байланышта.
Ошондой эле күзүндө бал азыктарын рационго кошууга болот. Алардын курамында ар кандай витаминдер жана микроэлементтер бар.
Микрожашылчалар да пайдалуу вариант болуп саналат. Аларды үй шартында өстүрүп, күзүндө жаңы жашылча-жемиштер азайган учурда тамакка кошуп колдонсо болот.
Ошол эле учурда адис иммунитетти бир гана азык-түлүк менен көтөрүүгө аракет кылуу туура эмес экенин белгилейт. Организмдин коргонуу жөндөмүнө туура тамактануу жана физикалык активдүүлүк да чоң таасир берет. Айрыкча күнүнө 7 сааттан аз уктоо суук тийүү жана вирустук ооруларга кабылуу коркунучун жогорулатышы мүмкүн. Ошондуктан күзгө даярдыкта туура рацион менен катар убагында уктоо, жөө басуу, сууда сүзүү же велосипед тебүү сыяктуу орточо физикалык көнүгүүлөрдү адатка айландыруу сунушталат.
