Коомдогу патриархалдык түшүнүктөрдүн, аялдарга болгон басымдын кесепети...
Борбор Азия өлкөлөрүндө уул баланы артык көрүү көрүнүшү жынысына карап тандалган аборттордун көбөйүшүнө алып келүүдө. Адистердин айтымында, бул демографиялык тең салмаксыздыкты жаратып, келечекте коомдук көйгөйлөргө себеп болушу мүмкүн.
Расмий маалыматтар боюнча, Өзбекстанда ар бир 100 кызга болжол менен 107 уул, Тажикстанда 110 уул туура келет. Эксперттер мындай айырмачылыкка үй-бүлөдөгү жана коомдогу патриархалдык түшүнүктөр, ошондой эле аялдарга болгон басым себеп болуп жатканын белгилешет.
Генетиктер баланын жынысы энеге эмес, эркектин сперматозоидиндеги X же Y хромосомасына байланыштуу экенин түшүндүрүшөт. Бирок аймактагы айрым үй-бүлөлөрдө кыз төрөгөнү үчүн аялдар күнөөлөнүп, аборт жасатууга мажбур болгон учурлар кездешет.
Адистер тандалма аборттор келечекте никедеги тең салмактын бузулушуна, аялдарга болгон басымдын күчөшүнө жана социалдык көйгөйлөрдүн көбөйүшүнө алып келиши мүмкүн экенин эскертишет.
