Аскарбек Күрүчбеков: “Түрк боордошторго аманаттарды тапшырып келдик”
Жогорку Кеңештеги “Ыйман нуру” фракциясынын жетекчисинин кеңешчиси менен ат жалында маек.
-- Күрүчбек мырза, Түркиянын кырсык болгон калааларында экенсиңер. Азыр акыбал кандай? Кандай окуяларга дуушар болуп жатасыңар?
-- Азыр Кудайга шүгүр, көп өлкөлөрдөн куткаруучулар келишип, иштеп, абал акырындап турукташып жаткан экен. Кыйраган үйлөр, уранды алдынан чыккан маркумдар, үйсүз, иши жок, жакындарын жоготкон адамдар кадам сайын кезиккенде жүрөк ооруйт. Учурда ал жерлерге жөнөкөй адамдар киргизилген жок. Элдер азырынча чатырларда, жеңил түзүлүштө жасалган жерлерде жашап жатышат. Башка шаарлардан тамак-аш кенен-чонон келип жатат. Булар ишинен, үйүнөн ажырап калгандыктан, акчага муктаж болуп турушат. Көп кабаттуу үйлөрдүн баары талкаланып жатат. Дагы деле уранды алдында калган адамдарды чыгарышууда. Бул жерге келгенибизге 3-4 күн болду. Өлкөбүздөгү активисттердин боордошторго деген аманаттарын жеткирүү үчүн келгенбиз.
Кыйналып жаткан муктаждарга баарын акчалай тапшырдык. Атайын уктоочу каптарды ала келгенбиз. Алар тапшырылды. Бул жерде жашаган, чатыр издеп жүргөн айрым кыргыз эжелерибизди да жолуктурдук. Мен ак калпак кийип жүрсөм, кызыгып артымдан келген вандык кыргыздар менен да баарлаштык. Биздин куткаруучулар жайгашкан лагерге барып, алар менен да учурашып кайттык. Эми мындан ары жакшылыктар эле болсун!
Жамиля Нурманбетова
"Азия Ньюс" гезити
