Ооганстанда тумоонун оор түрүнө кабылган балдар көбөйдү
Талибдер башкарып жаткан Ооганстандагы гуманитардык кризистин тушунда миңдеген балдар пневмония жана респиратордук вирустук инфекцияга кабылып, ооруп жатышат. Айрыкча кыш келгени абал курчуп кеткен.
Эл аралык Кызыл Чырым комитети беш жашка чейинки балдардын тумоолоп ооруканага жаткырылганы былтыркыдан 50%га көп болгонун билдирди.
2022-жылдын декабрында талибдер башкарган өкмөт эл аралык жана бейөкмөт уюмдарда гуманитардык багытта иштеген аялдардын жумушка чыгуусуна тыюу салган. Бул жагдайдан улам 180дей уюм ишин токтоткон.
Ооганстандагы эки миңге чукул кыргыз байырлаган Памир өрөөнүндө сасык тумоонун оор түрү күч алды. Жарым айдын ичинде 20дан ашуун киши каза болгонун бул аймактан Кыргызстанга келип отурукташып калган Абдулвакил Турдакун уулу билдирди.
