Ибрагим Жунусов: “Элчилерде көп сырлар бар, керек болсо аялдары да билбеши керек”
-- Кечээ жакында эле бир элчибиз сын айтып, кызматынан кол жууду. Өзү мамлекеттик кызматта иштеп, бийликти сындаган канчалык туура?
-- Мамлекеттик кызматтын өзүнүн этикасы бар. Ал кайсы орунду ээлебесин, ошол эрежени сактоого тийиш. Ал эми элчилердики андан дагы жоопкерчиликтүү болушу керек. Албетте, сын айтыш оңой. Убагында биз деле сын айтып жүргөнбүз, азыр кээ бирөөлөр “эмнеге унчукпай калдың” деп сурашат. Элчилерде көп сырлар бар. Анын баарын көпчүлүк, керек болсо чогуу жашаган аялың да билбеш керек. Албетте, сынды айтыш керек, эгер өзүңдүн тармагыңда ишке туура эмес мамиле болуп жаткан болсо. Бирок, анын өз жол-жобосу, этикасы бар да. Бизде ошол этика сакталбагандыгынан көп аксап жатабыз. Мен акыркы жылдары Түркияда, Өзбекстанда иштедим. Бул эки өлкөдө тең мамлекеттик кызматтагы адамдарга элден өз деңгээлинде мамиле болот. Алар өз ордун билип, кызматын так аткарганы үчүн сыйлашат.
-- Мындай көрүнүш айрым учурларда элчиликке кесипкөй, компетенттүү кишилер эмес, кимдир бирөөгө иш таап бериш үчүн эле дайындалып калганынын натыйжасы эмеспи?
-- Бир чети ушундай. Кээде ошондой болуп калат. Кимдир бирөөнүн оозун жаап турууга, бул жерде көп сүйлөбөсү үчүн элчилике жиберген учурлар бар. Бирок, кандай болгон күндө дагы ал кызматка дайындалгандан кийин бүт жоопкерчиликти өз мойнуна алып, өз милдетин талаптагыдай аткарууга милдеттүү.
"Азия Ньюс" гезити
