Айдоочулук күбөлүктү алуу үчүн 10-12 ай окутуу жарандарга кыйынчылык жаратабы?
Президенттин иш башкармасынын орун басары Бообек Салимжановдун билдиргенине караганда, эми айдоочулук күбөлүк алуу үчүн мамлекеттик автомектептерде жарандар 10-12 айга чейин окушат. Бир жылга созулган мындай “илим алуу” коомчулукта талкуу жаратууда. В категориясын окуу мөөнөтү 10 ай, С категориясынын күбөлүгүн алуу үчүн 12 ай убакыт кетмекчи. Буга чейин жолдо жүрүү эрежелери боюнча 750 суроо болсо, мындан ары 2000ге чейин көбөйүптүр. Мынчалык татаалдаштыруунун зарылчылыгын коомчулукка кантип түшүндүрөбүз? Авариялардын көбөйүшү – ичкилик ичкенден, бейбаштык жүрүштөрдөн, машиналардын арбыганынан, трассалардын тардыгынан, анан жол кыймылынын коопсуздугун кароонун жетишсиздиги, ж.б. ушул сыяктуу көрүнүштөрдөн келип чыкса керек. Негизи айдоочулук күбөлүктү алуу үчүн суроолорду татаалдаштырбай жеңилдетип, анан 2-3 ай гана окутуу жетиштүү болмок. Бул СССРден бери келаткан, изилденип, такталган практика эле. Азыр айдоочулук күбөлүктү алуу машакатка айланып, 10-12 ай окутуу жарандарга кыйынчылык жаратабы? Коррупция күчөсөчү? Негизи акыл калчап, элибизге ыңгайлуу шарттарды түзүшүбүз керек да. А болбосо Казакстандан 2 ай окуп, ошол жактан айдоочулук күбөлүк алууга ашыккандар арбып кетсечи? Турган иш да...
