Ош–Исфана жолундагы кырсыкта өлгөндөрдүн саны алты адамга жетти
Ош–Исфана жолунда 13-июндун түнүндө катталган жол кырсыгынан жабыркаган дагы үч киши ооруканада каза болду. Бул тууралуу өзгөчө кырдаалдар министрлигинин басма сөз кызматы кабарлады.
Буга чейин Ноокат районундагы Ош–Баткен–Исфана автожолунун 23-чакырымында эки унаа кагылышып, кырсык болгон жерде үч киши каза болуп, жаракат алган тогуз киши ооруканага жеткирилген. Бүгүн 14-июнда алардын үчөө көз жумганы белгилүү болду. Алар 5 жана 15 жаштагы балдар жана жаңы төрөлгөн ымыркай экени аныкталды. Кырсыктан жаракат алган алты жаш бала Ош облустук жана Ноокат райондук ооруканаларына жеткирилди.
Окуя болгон жерде ӨКМдин төрт куткаруучусу, бир “тез жардам” бригадасы жана милиция иш алып барууда.
12-июнда Бишкек–Ош жолунун 495-чакырымындагы жол кырсыгынан алты адам көз жумган. Ушул эле күнү Бишкек–Чолпон-Ата жолундагы кырсыктан үч киши мүрт кетип, алардын экөө жаш балдар болгон.
Кыргызстанда 12-июндан бери автокырсыктан 15 киши көз жумуп, ондон ашууну жарадар болду.
