Нью-Йорк соту “Кумтөр Голд Компанинин” өтүнүчүн канааттандырды
АКШдагы банкроттуулук боюнча сот 8-июнда “Кумтөр Голд Компани” жана “Кумтөр Оперейтинг Компани” компанияларынын өтүнүчүн канааттандырды. Нью-Йорктун Түштүк округуна караштуу бул соттун судьясы Лиза Бекермандын чечимине ылайык, эки компанияны юридикалык же административдик жоопко тартууга, алардан доо өндүрүүгө жана ал ишканалардын мүлкүн тартып алууга тыюу салынат. Ошондой эле кендин ишине байланыштуу контракттарды токтотууга же өзгөртүүгө да болбойт. Бул чектөө бардык жеке адамдарга жана чет өлкөлүк же жергиликтүү өкмөттүк мекемелерге да тийешелүү.
Бул чечим боюнча Кыргызстандын расмий органдары комментарий бере элек. Нью-Йорктогу сотко катышкан кыргыз өкмөтү жалдаган юридикалык компаниянын адвокаттары Кумтөр алтын кенине тыштан башкаруу киргизүү чечими мыйзамдуу болгонун белгилешти. Кыргыз өкмөтүнүн кызыкчылыгын коргогон адвокаттар Нью-Йорктогу соттук териштирүүгө каршы арызданууну көздөп жатканын 8-июнда “The Wall Street Journal” басылмасы жазды. Кумтөргө байланыштуу Нью-Йорктогу соттук отурум дагы улана турган болду.
"Азия Ньюс" гезити
