Өмүрбек Суваналиев: "Кыргыз тараптын мүмкүнчүлүгү жана күчү жетиштүү"
Баткенде кыргыз-тажик чек арасындагы Кара тилкесинде жайгашкан "Төрткүл” чек ара тозотунун имараты күйүп жатат, ал жерде эки өлкөнүн аскерлеринин атышуусу уланууда. Бул тууралуу 29-апрелде саат 18:50дө “Азаттык” радиосуна өкмөттүн Баткен облусундагы өкүлү Өмүрбек Суваналиев билдирди.
Суваналиев кыргыз тараптын мүмкүнчүлүгү жана күчү жетиштүү экенин билдирди.
28-апрелде Кыргызстандын Тажикстан менен чектеш аймагында, Баткендин Ак-Сай айылындагы Ак-Суу дарыясында жайгашкан башкы (“Головной”) суу бөлүштүрүүчү жайдын тилкесинде кагылыш болуп, кыргыз тараптан төрт, тажик тараптан жети адам жараат алганын эки өлкөнүн Чек ара кызматтары билдирген.
29-апрелде да жаңжал уланып, соңку маалыматка караганда, кыргыз тараптан жалпысынан 17 адам жараат алды, бирөө каза болду. Тажик тараптан бүгүн жабыркагандар барбы же жокпу, расмий айтыла элек.
