Эки балалуу келинге ойлонбой туруп үйлөнүп алдым
Мындан беш жыл мурун бир кыз менен сүйлөшүп калдым. Жакшынакай, арыкчырай, уялчаак кыз эле. Бир күнү “үйлөнөлү” десем, “жок” деп эле болбой койду. Себебин айтпай кетип калды. Кийин мага смс жазып, “менин эки балам бар, кечир” дептир. Ишенбей, кызыктай эле болуп отуруп калдым. Эртеси жумушуна барып күтүп, чыкканда машинага отуруп алып сүйлөштүк, баарын айтып берди. Күйөөсү экинчи баласы боюнда барда каза болуп калыптыр. Мен ойлонбой эле “үйлөнөм” дедим, аны жоготкум келбеди.
Баарына көздү жумуп, үйлөнүп алдым. Ата-энем башында нааразы болушту. Бирок, Гүлзина жакшы келин болуп чыкты. Катары менен эки уул төрөп берди. Азыр бактылуу үй-бүлөбүз. “Кызга бергис жубан бар” деген кеп бекер жеринен чыкпаса керек деп кээде макалдарга маани берип калчу болдум.
Артур