Мурдагы күйөөм сөз айтып, “эч кимге билинбей жүрүүнү” сунуш кылууда
Жашым 30да, бир балам бар, ал 9 жашка толду. Күйөөм менен ажырашканыма 8 жыл болду. Ошондон бери күйөөгө тийбей калдым. Сезимди козгогон, ойдогудай күйөө чыккан жок. Мага жакканга мен жакпай калам, айтор, турмуш курбай, жашым дагы өтүп баратат. Жалгыздыктан ушунчалык тажадым. Мен да күйөөгө тийип, дагы төрөп, бактылуу болгум келет. Бала жытын сагындым. Балам да айтат. “Апа, сиз эмнеге төрөбөйсүз? Төрөңүз” деп калат. Балама аябай боорум ооруйт. Баламдын атасын мен төрөгөнчө эле апасы башкага үйлөндүрүп салган. Азыр ошол аялы менен жашайт. Үч баласы бар. Учурда мага чалып, жазып турат. “Эмнеге күйөөгө тийбейсиң?” деп сурай берет. Анан дагы азгырат. “Мен сени сүйөм, унута албайм. Экөөбүз эч кимге билдирбей жүрө берели, никебиз болгон да” дейт. Эми кандай кадамга барсам, кеңеш айтыңыздарчы?
Гулиза
"Азия Ньюс" гезити
