Күйөөм “кетсең өлүгүң чыгат, эч жакка кетпейсиң” деп коркутуп жатат
Мен 24 жаштамын. Турмушка чыкканыма 2 ай болду. Бул экинчи турмушум. Өзүм сүйлөшүп жүрүп турмушка чыккам. Биринчи турмушумдан бир уулум бар. Ал эки жашка толо элек. Азыркы учурда жашоом караңгы болуп, өлүк адамдай эле жашап жүрөм. Жашоонун кызыкчылыгы жоголуп, сыгылып кеттим. Күйөөм өтө кызганчаак. Сүйлөшүп жүргөндө да кызганчу эле. Бирок мынчалык экенин такыр билбепмин. Болоор болбоско кызганып уруш чыгарат. Эки ай болуп боло электе мени уруп баштады. Эч жакка чыгарбайт же өзү кошулуп чыгат. “Баламды сагындым, бир-эки күнгө алып келип карайын” десем көнбөй койду. Эркин адамга окшоп жашагым келет. Турмушка чыкканыма аябай өкүнүп жатам. Ар кандай ойлор келет. Качып кетип, иштеп, бутуман туруп, үй алып, балам менен кеңири жашоону каалайм. Бирок күйөөм “кетсең өлүгүң чыгат, эч жакка кетпейсиң” деп коркутуп жүрөт.
Нуриза
