Алты балабыз бар. Күйөөм “кыз төрөбөйсүң” деп чатак салганын күчөттү
Жашообуз орточо, элден кем калбай жашап келе жатабыз. Мени түйшөлткөн бир суроо болуп жатат. Алты эркек балам бар. Жолдошум “кыз төрөп бербейсиң” деп эле дайыма чыр чыгара берет. Өзүм дагы кыз баланы жакшы көрөм. Үйдө абдан кыздуу болууну күтүп жүрөбүз. Дарыгерлер ден соолугума байланыштуу азырынча балалуу болууга тыюу салышты. Акыркы күндөрдө кыздуу болбогонубуздун айынан үй-бүлөдө уруш-талаш көп чыкчу болду. Жолдошум “баланчаныкына барсам, кызын эркелетип отуруптур, түкүнчө кызын куурчактай кылып кийинтип ээрчитип жүрүптүр, мен карап алып жаман болдум” деген сыяктуу кептерди айтып, арман кыла берет. Эч кимге деле айта албайм. Кыздуу болууну каалап уруш чыгарган эркектер барбы же менин эле жолдошум ушундайбы? Түшүнө албадым. Кээ бирөө тескерисинче “уул төрөп бербейсисиң” деп чатак салат го. Аялдар бул учурда эмне кылыш керек?
Жазгүл
