Үйдөгү суумайды, кумшекерди огородго чуңкур казып көмүп...
Barometr.kg сайтынын дарегине, соцтармактагы баракчасына көптөгөн каттар келет. Бул жолу Айжамал (аты өзгөртүлдү) аттуу окурман төмөнкүдөй суроо менен кайрылды.
“Саламатсыздарбы! Мени үй-бүлөдөгү жагдай тынчсыздандырып келет. Үйдө атам арак ичет, апам болсо дайыма андан тамак-ашты катып коёт. Мен эс тарткандан бери эле атам ичкенин токтотподу. Көзү ачыктарга, бүбү-бакшыларга, дарыгерлерге, наркологдорго деле алып барып көрүштү. Атам өзү ичпегенде деле, ичкенде деле тынч жүрүп, ызы-чуу чыгарбайт, бирок эң жаман жери үйдөгү акчаны, жеңил буюмдарды, тамак-ашты сатып, айланадагы дүкөндөргө алып барып берип, анан аны ичимдикке алмашып алып ичет. Ошондуктан апам дайыма аларды катат. Эми жакындан бери апам жаңы бир ыкма тааптыр, уксаңыз таңгаласыз. Үйдөгү суумайды, кумшекерди огородго чуңкур казып көмүп, анан ошондон атам жокто алып чыгат. Анын үч баласын багып чоңотом деп тартпаган түйшүгү калбады. Мен турмушка чыккандан тартынам, “атасы ичкич экен” деп айтышат го дейм. Айтор, кыйын эле жашоодо жашап жатабыз. Атам ичкенин токтоторуна деле көзүм жетпейт. Мага кеңеш, жөн гана колдооңуздар керек деген ойдо ушул катты жаздым” дейт Айжамал.
Айжамалга жакшы пикир бөлүшүп коюңуз, урматтуу окурман!
