Руслан Акматбек: “Биз эгемендүү өлкө болобузбу, же ар кимдин саясатын ээрчий беребизби?”
-- Учурда экономикабызды көтөргөн, таяныч болгон – сыртта иштеп жүргөн мигранттардын салган акчасы күч берүүдө. Бирок бул каражатты алуу да көйгөйгө айланды. Чечүүнүн жолу барбы?
-- Мындай окуяга мен да дуушар болдум. Өткөндө банкка барып, четтен келген акча которууну кыргыздын сому менен алалбай койдум. “Рубль менен аласың” дейт. Россиядан доллар менен келген арзыбаган акча эле, рубль менен гана алышым керек экен. Кыргызстанда туруп сом менен алалбайт имишмин. Биринчи “Улуттук банктын токтому бар” дешти, бирок көрсөтө албай коюшту. Көрсө, жок экен. Рубль менен алсаң, аны дагы бир жолу кыргыз сомуна которуш керек. Эки жолу конвертация... Утуласың. Биз эмнеге Россиянын акчасын колдоп жатабыз? Биз эгемендүү өлкөбүзбү, же ар кимдин саясатын ээрчий берген байкуш, ары жок мамлекетпизби?! Бирөөлөр доллардын баарын кагып, рублдарын тоодой үйүп кетсе, жөнөкөй жаранда эмне күнөө? Жаның кашаябы анан?! Бул Киев көчөсүндөгү KICB банкындагы көрүнүш. Карапайым адамдардын канын соргон мындай көрүнүштү ким тыят? Ким жооп берет? Качан артты көздөй эмес, алдыны көздөй кетебиз?..
"Азия Ньюс" гезити
