Канышай Мамыркулова бийлик менен күрөшүүдө көргүлүктү көрсөтчүдөй...
Журналист Канышай Мамыркулова Ысык-Көлдөгү сел түйшүгүн көтөрүп, Фейсбук баракчасы аркылуу ой-пикирлердин талкуусун жаратты. Өзгөчө Темир айылындагы жарандардын үйлөрү жараксыз калып, көңүл чордондогу көйгөйгө айланды. Бир топ убакытка чейин өкмөт башчы, министрлер барбай жатып алышып, акыры барышты окшойт. Ал ортодо Канышай Мамыркулова МБанк аркылуу элден акча чогултуп, мекендештеринин кем-карчтарын чечүүгө далбас уруп, патриоттук сезимин көрсөттү. Мындай шартта “фейк фабрика” Канышай айымдын аракетине асылышып, жамандашып, адаттагыдай “жарма чалганга” жарашты. Коомчулук астында баары көрүнүп турат эмеспи. Анчейин деле чечмелөөнүн кажети жок. “Элдин көзү көрөгөч” деп бекер айтылбаса керек. Натыйжада, бийлик менен күрөшүүдө Канышай Мамыркулова упай алып, оозго алынып, күрөшчүлдүгүн, кайратмандыгын далилдеп атат.
"Азия Ньюс" гезити
