Сабыр абаны Байсалов актады, а өзү да билдирүү кылса болот беле?
Учурда бийлик күчтүү. Ошого жараша бугуп жаткан таасирдүү душмандары да арбын. Саясый эрөөлдөр алдыда окшойт. Маал-маалы менен маалыматтык чабуулдар жасалып, “отко май чачууга” аракеттер байкалууда. Бул эми бийлик үчүн табигый күрөш да...
Бир эсе кандай гана кысымдар жасалбасын, кыргыз коомчулугу активдүүлүгүн көрсөтүп келет. Алтындын куймалары тартылып, “Сабыр аба” боюнча айтылган видео соцтармакта, эл арасында “чуу” жаратып, кызуу талкууга “жем” таштады. Ар кандай баа берүүлөр уланууда.
Ушундай жагдайда вице-премьер-министр Эдил Байсалов Фейсбукка пост жазып, сырттагы журналист Болот Темировдун ал видеосун жалган жалаа, фейк, душмандык катары сыпаттап, өзүнүн аргументтерин келтириптир. Окуган адамга Байсаловдун пикири ынанымдуудай сезилет. Себеби, ал чын жүрөгүнөн күйүп-бышып, алтын уурдалбай турганын баса белгилеп, бир канча негиздемелерди келтирген. Кантсе да билимдүү, саясатта тажрыйбалуу эмеспи.
Ал эми Сабыр Жапаровго келсек, алтынга байланыштуу экинчи ирет чыккан чуулганы болуп атат. Мурда да слитокторду кармаган сүрөтү жарыяланган. Бирок конкреттүү түрдө алтындарды сатып, байып жатканы боюнча фактылар жок. Божомол, күмөн саноолорго гана кептелесиң. Андыктан, Сабыр Жапаров үн катып, же билдирүү жазып деле коомчулукка кайрылып коюшу керек го?
Убакыт, мезгил мерчеми акыр түбү чындыкты чыгарат...
"Азия Ньюс" гезити
