Парламенттик шайлоого кандай жолду тандасак ыңгайлуу?
Мелис Арыпбек, публицист:
-- Албетте, бир манданттуу жол гана ылайыктуу экенин мезгил өзү далилдеди. Ага чейин түп-тамыры менен партиялык система менен бычылган. Текебаев мыйзамын жоюп, жапжаңы эл өзү иштеп чыккан кыргыз нарктуу Башмыйзамды элдик курултай аркалуу кабыл алуубуз зарыл...
Замир Айылчиев, жарандык активист:
-- Түрдүү пикирлери менен депутаттар элдин башын тегеретти. Менимче, пропорционалдуу 3% барьер, 1 млн. сом төлөм жана 70 депутат болсо жетет. Перспективдүү, билимдүү депутаттар келмек. Бул сапар элдин үмүтү чоң болуп турат. Бул ирет да ишенимден кетүү элге оор тийет. Ошондуктан “жети өлчөп, бир кесип”, эл адамдарын парламентке алып келүү милдети турат.
Ренат Самудинов, жарандык активист:
-- Парламенттик шайлоого пропорционалдык жана преференциалдык система менен барыш керек. Себеп дегенде, лидерлер бекиткен тизме эмес, элдер партиянын ичинде эле өз каалаган адамына добуш бере ала турган системаны тандаш керек. Ошондо эмгеги сиңген, чыныгы иштерман эл өкүлдөрү тандалат. Можаритардык система – кечээ күнкү биздин тарыхыбыз. Кайра тырмооч менен бир жерди баса берүүдөн жыйынтык деле чыкпайт. Убагында Аскар Акаевден башка адам президент болуп калганында (диктатор), күчтүү саясатчылар кайдан баш көтөрмөк? Акаев демократ, илимпоз, жумшак болчу да. Айбаттуу оппозиционерлерди көчөдө эмес, парламентте кармагандыктан, ошол учурда күчтүү саясатчылар парламентке келгенине күбө болгонбуз. Азыр деле ошол учурга окшош, бирок партиялык система менен барса, ал жакта квоталар, көп нерселер каралат. Кыскасы, мамлекетти парламенттик система менен алдыга жылдырууну туура деп ойлойм.
Жамиля Нурманбетова
"Азия Ньюс" гезити
